last na jud ni!

Katapusan Kong Panamilit
mi ultimo adios-Dr. Jose Protacio Rizal

Adios pinanggang nasud bahanding sa adlaw puluy-anan
Mutya sa silangang dagat, Eden namong gikamingawan
Kaikag kong kanimo itanyag, subo ug dulom nga kinabuhi
Apan kung mas sanag, mas lab-as ug mas mabulakon pa kini
Gihapon ihalad ko kanimo, kanimo sa gihapon.

Sa natad nga pag-awayan, danag sa panagsangka
Managtahan sa kinabuhi, way pagpanuko way panagmahay
Way ayran may cipres, lireo, laurel o wala
Gairan o hawanan, bugno o silot
Tanan managsama lang kay gipangayo sa nasud.

Sud-ongon kos pagkamatay, langit nga sa bulok nagbukhad
Tapos nga ang kandungga sa kangitngit magsibyag laing adlaw
Kung mangayo kag pula sa imong banagbanag
Dugo ko ipaagay, ibisibis sa tukmang takna
Ug hinaplinan unta kinig aninag sa langit nga nagpasilaw.

Damgo sa akong kabayongbayong
Damgo sa batan-ong hupong sa kinabuhi
Nga lantawon ka uska adlaw niana mutya sa lawod sa sidlakan
Magpahid sa mata mong maitom, sa pinataas mong agtang
Way gum-os, way kisdom way buling sa kaulawan.

Pangandoy sa bug-os kong kinabuhi, nagbaga kong tinguha
Maggasinggit ug Salud! kining kalag kong mobiya
Alang sa kaayohan mo! Katahum sa pagkahagsa kun magtuboy kini kanimo
Sa pagkamatay aron ka mabuhi, mamatay silong sa langit mo
Sa yutang tulukibon mahinanok sa dayon.

Kung usa ka adlaw sa ibabaw sa lubong ko motumaw
Usa ka dyutayng bulak taliwala sa kasagbutan
Sa mga ngabil mo kini idul-it ug mahagkan mong akong kalag
Sa agtang ko mosapigad, ilawom sa bugnaw kong lubnganan
Lunsayng huyop sa imong kaaghop, dagaang sa imong gininhawa.

Padan-aga ang bulan sa humok niyag malinawong hayag,
Padad-i sa kaadlawon og diyutayng iwag,
Pahurosa ang hangin sa mga agulo niyang inanay
Ug kung may langgam nga mokunsad ug mobatog sa akong balabag
Paawita siyag saloma sa kalinaw.

Sa adlawng nagdilaab, paugha ang mga ulan
Nuntan sa mga dangoyngoy kong mangalunsay inigkayab.
Tugoting mohilak usa ka higala ning nahasayo kong panaw.
Kung may mag-ampo alang kanako sa mingawng kahaponon,
Nasud ko! ipangamuyo usab ang akong kapahulayan.

I-ampo mong mga way palad nga nangapukan,
Mga nanag-antus sa kapintas nga way sama,
Mga inahan tang kabus nagabakho sa kaguol ug kapaitan,
Mga ilo ug mga balo, mga binilanggong gipanagtampalas,
Kanimo usab, makab-ot mo unta sa katapusan ang kagawasan.

Liminan na man ugaling ang sam-ang sa ngi-ob nga kagabhion
Ug mga patay na lang ang nagpabiling nanagtukaw
Hilabti ayaw ang pahulay, ni ang tanghaga niini
Ug kung may madungog kang huni sa gitara ug salterio
Ako mahal kong nasud ang nagalaylay alang kanimo.

Kung ang gilubngan ko hitaligam-an na lang
Way krus, wa nay batong-timaan sa akong higdaanan
Ipakandos kini og pala, ipabugwal sa katawhan,
Ug sa dili pa mahanaw ang akong mga agbon
Mangahimo unta kining abog nga magbanig sa inyong kaumahan.

Pasagdi na lang nga itunod ko sa kalimot
Likop, patag, walog mo tabokon ko
Ako ang mayâ ug huning mananoy sa imong mga dalunggan
Alimyon, kahayag, bulok, bagulbol, agulo ug awit
Nga kanunayng magaasoy sa uyok sa akong pagtoo.

Nasud kong gisimba, kagul-anan sa akong kasakitan
Mahal kong Pilipinas ipaabong and dunggan mo sa panamilit ko
Kanimo ko itugyan mga hinigugma kog mga katigulangan
Panawon kong dapit nga wa nay mga ulipon, mga berdugo'g mga banyaga
Nga dili hilo ang tinuhoan, nga ang Dios lang ang namunoan.

Adios mga ginikanan ko, mga igsoon, tipik sa akong kalag
Higala sa pagkabata sa mawala ko karong puluy-anan
Ipasalamat nga makapahulay na ako human sa kabudlay ning adlawa.
Adios tam-is nga dumuduong, higala ko'g kalipay
Adto na ako mga hinigugma, pagpahulay ang pagkamatay.