limbong sa karnabal

Sulod sa "Auditorium" sa Karnabal. Ang "banda municipal" nagtogtog sa mga matahum nga "one step". Dili maisip ang mga "pareja" nga nanagsayaw. Katawa diri. Tiaw didto. Salibay sa "conffeti". Mga pasumbingay sa gugma....Sa usa ka bangko, naglingkod ang duha ka tawo. Babaye ang usa nga nagmaskara ug lalake ang ikaduha nga walay maskara. Ang lake nagkanayón:

--Dali na, matahum kó. Anus-a pa nimo akó kaloy-i? Gihigugma kó ikaw!

--Gihigugma akó nimo, apan wala akó mahigugma kanimo--mitubag angbabaye.

--Intawon! Dili ka malooy kanako? Ulipna akó; pangayo-i akog kamatuoran sa akong gugma; ug tanan, lakip kining kinabuhi, akong ihatag, akong ipangahas, aron lang makaangkon nianang imong mga matam-is nga mata....

--Aaa! Matį da gayud ang imong gikaibgan kanako?--mitubag nga nagkatawa ang nagmaskara.

--Ang imong mga matahum nga mata; ang imong kasingkasing bulawanon;ang imong langitnong kaanyag, kanang tanan, maoy nakapadani sa akong kalag. Unsa na, mahimo ba nga ilhon kó ikaw nga ako sukad ning mga gutloa?

--Apan, ayaw una: nakaila ka ba kanako? Tingali bayag nahigugma kasa usa ka babaye nga dili mó kaila. (mikatawa ug nagmalomó ang babaye).

--Akó dili nimo kalimbongan--mitubag ang lalake

--Ikaw maó si Marieta, ang akong pinalangga, ang bugtong hari ning mga damgo. Marieta, Marieta, but-a na intawon akó; kini maó na ang katapusang takna sa atong panagkakita.

--Apan ikaw nasayud nga akó minyo; ikaw nasayud nga akó adunay bana. Matarong ba nga kuhaan mó akó sa dungog?

--Unsay sapayan niana? Ikaw minyo; ang imong lawas ginapus sa talikalang yutan-on; apan ang imong kasingkasing, ang imong kalag, gawas ug walay makagapus kanila. Ang kaminyoon maoy usa ka butang lumalabay; dili maó ang gugma; ang matuod nga gugma maó ang gugmang gawas, ang wala magtagad nianang mga binuang sa katawohan....

--Kong akó mobuut kanimo, unsay ipulong kanako sa akong bana? (masulub-on)

--Unsay ipulong niya?

--Nga magpailob siya. Dili mahimo nga iunong mó ang imong bulawanong umaabut sa usa ka bana nga "desgraciado"sama kaniya.

--Ambut lang unsay dangaton nato! (paraygon).

--Ang himaya maoy atong madangat! Marieta, higugmaa na akó, ingna akó nga akó imong gihigugma, nga akó imong gipangga....

Ang sayaw nagapadayon. Madasigon kaayo. Ang mga nanagmaskara nanaghudyaka. Katawa, singgit, kagahob, maoy naghari. Halus dili madungog ang mga sulti tungud sa kasaba.Ang duruha nga nanagsulti mitindog ug napadulong sa usa ka dapit nga hilit. Ang lake nagkanayón:

--Pinangga, kuhaa ang imong maskara; patan-awa akó pagbalik sa imong kaanyag; patan-awa akó kay buut ko sublion ang akong pagtoo nga sa ibabaw ning tanang kahayag, sa ibabaw ning tanang kalipay, nagaharisa gihapon ang imong katahum; pahagka akó....

--Kay gipangayo man nimo nga kuhaon ang maskara, akong kuhaon ugod. Ang babaye mikuha paghinay sa iyang maskarį ug dakung kahikugįng!

Ang lake misibog pagkalit ug misinggit pagingon:

--Susmarosip! Pasayloa asawa kó! Conching, dili ko na gayud usbon!Ug ang lake miluhod, midukó nga mapaubsanon na kaayo, samtang ang babaye, maugdang ang tinan-awan, pinataas ang agtang, namulongsa ingon:

--Maó diay kini, Pepe, ang imong "vicio". Bantug da nga ikaw nanlimbasog gayud sa pagtaptap ug pagtakuban ning mga gabhiona. Ikaw dili maayong bana; ikaw makaako diay sa pagtalikod kanako ug makaako sa paghigugma ug laing babaye. Gipakaingon mó nga maó akó si Marieta ug bisan ania kita sa taliwala sa "Auditorium", gipagula mó ang imong paglapas sa imong pagkaminyo. Dautan, dautan kining imong buhat. Karon dili ka na makalimod kay hisakpan ko ikaw. Apan nganong moingon ka nga ang kaminyoon maoy binuang ug ang GUGMANG GAWAS maó ang matuod nga gugma? nganong sugyutan mó ang usa ka babayeng minyo aron mobuling sa iyang kaminyoon? maó diay kanį ang imong "teorķa"? Kong maó kana, magbulag kita!

--Conching, pasayloa intawon akó; dili ko na usbon. Maó kadtoy usa ka damgo, usa ka salimuang, usa ka binuang....

Si Pepe midukó, naghilak....
Si Conching giabut ug kalooy sa iyang bana ug unya, punó sa kalomó ug nagkatawa, miingon:

--Karon, una kó ikaw pasayloon, buut kó unta hinsayran: kinsay imong palabihón sa paghalok: si Marieta kun akó?

--Ikaw, ikaw gayud, kay maó man ang akong bugtong kauban ning kinabuhi.
Niadtong hilit nga dapit, luyó sa mga lingkoranan ug mangitngit,milanog ang usa ka halók, nga maó ang timaan sa kalipay, himaya ug kalinaw sa usa ka magtiayong bulahan....