vow of celibacy

Septembre 23, 2008.Pipila ka mga semana sa wa pa moabut kining maong petsa, gibati ko ang kakuyaw ug kakulba nga sagol ang kahinam. Mao ba kaha kini ang gibati sa tanang niagi sa akong agian? Sukna ko’s akong kaugalingon. Mao ba sab kaha ni ang gibati sa mga ulitawo nga hapit na kasla? Kana wala ko hisayri. Pero, basin susama lang tungod kay susama man ang gipangayo nga mithi nga angay puy-an sa usa ka minyo ug sa usa ka “celibate”. Ang duruha nagkinahanglan og bug-os nga hunahuna ug kasing kasing nga dili na mangitag laing asawa/bana alang sa mga minyo, ug ang dili pagpangitag asawa alang sa usa ka clerigo.

May mga kaadlawon nga magum-os ang akong banig sa pag-alindasay. Tungod tingali kadto sa kakulba, tingali usab sa kahinam. Ang akong hunahuna santopan sa mga pagpangandoyng sama niini: nga nindot gyud tingaling duna koy asawa kay aduna koy ikasulti-sulti, kasumbongan, mahalon, katupad sa pagkatulog ug uban pa. Ilabi na gyud kalalim kung tagikan ko panahon sa hilanat unya dunay mosalimbong kanakog habol gikan sa katugnaw ug motunol sa mainit niyang mga bukton...You know na!

Usahay sulod sa akong handurawan palandungon ko ang pagsibog ning maong bokasyon. Daw gikuninitan, daw gitapok-an ko sa daghan uyamot nga mga pangandoy ug posibilidad sa kinabuhi ug sa mga posibling maayong dangatan ko sa natad sa panrabaho. Akong paghilantawan ang kinabuhi sa usa ka pari; ang hilabihang kamingaw diha sa katigulangon tungod kay balo nga unay kun biyudo nang daan. Kung sa iningles pa “frozen delight and forbidden fruit”... mipaambit lang kos akong gibati. Kalma lang mo diha.

Septembre 23 sa hapon dili na nako masabot ang akong gibati, nangompisal mi ug ang akong classmate- si Lumardz. Kini kauban sa mga pangandam sa pagsulod sa kinabuhi nga dili tiaw. Kay tiaw ba diay nang pagsaad nga dili na magminyo? Nga usahon ang hunahuna alang sa kaayohan sa katawhan sa Dios ug dili sa kaugalingon o sa pipila lang ka mga linalang- asawa ug mga anak.

Ug niabot gyud ang akong gikahidlawan ang Candidacy to Holy Orders. Alas 6 kadto sa bag-ong gabii. Miabot ang Talahurong si Obispo Julito Cortes aron mopasaad kanamo nga among putlon…ang among pangandoy nga magminyo...Usa ka butang nga dili nako malimtan sa iyang wali mao "ang paghinumdom sa tanang grasya nga midangat sa among kinabuhi"…ug paspas nga mibalik ang akong handurawan gikan sa akong pagkabata…ang kaugalingon kong kinabuhi ug kaantigohan, ang akong pamilya nga maoy unang nag-umol kanako nga maingon ko karon niini. Ug daw mihunong ang mga gutlo...nahinumdom ko niadtong ako first year philosophy. Gituhoan ko nga biyaan na mi sa among inahan tungod kay sumala sa diagnosis sa mga doktor aduna siya'y rheumatic heart disease ug tubercolosis of the lungs...nag-anam siyag higos hangtud nga ang iyang paa inogn na lang kadako sa akong niwang nga bukton. Niadtong tungora dunay mga gabii nga didto ko gigahin ang akong mga gabii sa ospital imbis sa seminaryo. Ug taliwala sa mga luha akong gihulga si Jesus niining mga pulong: Jesus maunsa gani ang akong nanay, mamutos gyud kog way langan dinhi sa seminaryo...!

Ug salamat sa Dios. Usa lamang kadto sa mga hitabo sa akong kinabuhi diin na-confirm ang akong desisyon nga mag-pari. Karon, si Nanay maoy nibayad para sa akong celibacy ring nga magpahinumdom kanako sa akong hunahuna sa upat pay akong edad, nga akong ihalad ang tibook kong kinabuhi ngadto sa Dios ug sa iyang mga gimahal diha sa pagkapari.

Kung magsud-ong ko sa mga tudlo sa akong mga kalumon sa seminaryo, tugkag pahiyom ang akong panagway sa paghunahuna nga daghan diay kami nga mibuhat og usa ka maayo nga desisyon sa kinabuhi, daghan usab kaming magtinabangay panahon sa mga unos nga among mabagatan ug daghan kami nga magbudlay sa parasan sa Dios.

Sa mga gabii nga milabay sukad niadtong Kandidasiya sa Santos nga Orden akong giingnan si Jesus: Noy, wa ko mahibawo unsay dangatan ning akong kinabuhi usa ray akong nahibaw-an ug nisalig ko niini, nga bisan pag mobalit-ad ning akong kinabuhi dili ko nimo biyaan.